कुलमान घिसिङलाई बर्खास्त गर्ने सरकारको निर्णय

काठमाडौं : नेपाल विद्युत् प्राधिकरणका कार्यकारी निर्देशक कुलमान घिसिङलाई सरकारले पदमुक्त गरेको छ। सोमबार बसेको मन्त्रिपरिषद् बैठकले घिसिङलाई हटाउने निर्णय गरेको हो ।

२०७८ साउन २५ गते बसेको मन्त्रिपरिषद् बैठकमार्फत घिसिङलाई दोस्रो कार्यकालका लागि प्राधिकरणको कार्यकारी निर्देशकमा नियुक्त गरिएको थियो। चार वर्षे कार्यकाल उनका लागि आगामी साउन २४ गतेसम्म रहने तय भए तापनि, अवधि नसकिँदै सरकारबाट उनलाई हटाइएको हो।

डेडिकेटेड र ट्रंक लाइनसम्बन्धी विषयले घिसिङलाई विवादमा ल्याएको थियो। उद्योगहरूको विद्युत् लाइन काट्ने विषयलाई लिएर घिसिङ र सरकारबीच मतभेद देखिँदै आएको थियो। यसअघि, नेपाल विद्युत् प्राधिकरणले डेडिकेटेड र ट्रंक लाइनको बक्यौता महसुल नतिरेको भन्दै केही उद्योगहरूको लाइन काटेको थियो। तर, एमाले अध्यक्ष केपी शर्मा ओली नेतृत्वको सरकार बनेपछि ती उद्योगीहरूको लाइन पुनः जडान गर्ने निर्णय गरिएको थियो।