रवि लामिछानेलाई किन छाडेको भन्दै युवराज सफलद्वारा न्यायाधीश राईविरुद्ध उजुरी

राष्ट्रिय स्वतन्त्र पार्टी (रास्वपा) का सभापति रवि लामिछानेलाई रिहा गर्न आदेश दिने कास्की जिल्ला अदालतका न्यायाधीश नीतिज राईविरुद्ध उजुरी दर्ता भएको छ।

उक्त उजुरी युवराज सफलले न्याय परिषद्मा दर्ता गराएका हुन्। 

युवराज सफलले सहकारी ठगी, संगठित अपराध र सम्पत्ति शुद्धिकरण मुद्दामा रवि लामिछानेलाई धरौटीमा छाडिएको भन्दै न्यायाधीश राईविरुद्ध न्यायपरिषद्मा उजुरी दर्ता गराएका हुन्। सफलले शुक्रबार उजुरी दर्ता गरेका हुन्।

उजुरीमा न्यायाधीश राईले रविलाई थुनामा पठाउन पर्याप्त प्रमाण र तथ्य हुँदाहुँदै पनि ६५ लाख रुपैयाँ धरौटीमा तारेखमा रिहा गरेको भन्दै आदेशविरुद्ध असहमति जनाइएको छ।

सफलले उजुरीमा भनेका छन् कि पुर्पक्षका लागि थुनामा राखी मुद्दा अगाडि बढाउनुपर्नेमा, न्यायाधीशले दाबी गरिएको बिगो रकमभन्दा निकै कम धरौटी तोकी छाड्ने निर्णय गरेका छन्। उक्त निर्णय कानुनी, न्यायिक र व्यवहारिक कुनै पनि आधारमा न्यायसंगत नभएको उजुरीमा उल्लेख गरिएको छ।